Fuente: Auñamendi Eusko Entziklopedia
Idazle arabarra. Gasteizen jaio zen, Ama Zuriaren plazan, 1869ko martxoaren 15ean eta 1942ko irailaren 9an hil zen Tolosan (Frantzia), 73 urte zituela.
Batxilergo ikasketak Urduñako Jesuiten ikastetxean (Bizkaia) hasi zituen 1880an eta lau urte beranduago Loiolako nobiziotzan sartu zen. 1894-1899 bitartean irakasle modura aritu zen Ordenako hainbat ikastetxetan: Valladoliden, Salamancan, Oñan eta Gijonen. 1896an, 27 urte zituela, euskara ikasteari ekin zion, ez baitzuen ezagutzen. Teologia ikasketekin jarraitu zuen eta Oñan apaiztu zen (1904). 1906an Filosofia eta Letren lizentziatura eskuratu zuen Salamancako Unibertsitatean; ondoren irakasle jardunarekin eta euskara ikasten jarraitu zuen.
Ezkerretik eskubira: (zutik) Sebero Altube, Julio de Urquijo, Raimundo Olavide Carrera; (eserita) Resurrección M.ª de Azkue, Georges Lacombe. 1927. urtea.
Zazpi urte beranduago, 1914an, euskaraz idatzitako lehen lana argitaratu zuen. Loyola’tar Eneko Deunaren Gogo Iñarkunak; “Ejercicios Espirituales de San Ignacio de Loyola” lanaren euskarazko itzulpena, hain zuzen. La Guardia ikastetxean irakalse izan zen, Camposancosen (Pontevedra). 1917an Giza-Soña lana argitaratu zuen Tolosan; gizakiaren lexiko anatomiko eta fisiologikoaren ikerketa.
Oñatin egindako Eusko Ikaskuntzen I Kongresuan parte hartu zuen (1918) eta hurrengo urtean, euskaltzain izendatu zuen Euskaltzaindiak. 1920an Kristo’ren Antzbidea agertu zen Donostian, Kempisaren bederatzigarren itzulpena. 1921ean bi lan garrantzitsutan murgildu zen: Giza-gogoa eta Bibliaren itzulpena. 1931n Itun-Berria argitaratu zuen Bilbon. Urtebete geroago, Arantzazuko Frantziskotarren Komentuan harrera hartu zuen gobernuaren aginduz Jesusen Konpainia desegin zenean. 1937an bonbardaketa gertatu zenean, Gernikan zen Olavide. 1937-1942 bitartean Bibliaren itzulpen zuzena amaitu zuen Tolosako (Frantzia) Sortzez Garbiaren ikastetxean erbesteraturik bizi zela.
1958an bere lan bikainena argitaratu zen Bilbon: Itun Zar eta Berria. 1959ko martxoaren 15ean lehen aldiz omenaldia egin zitzaion Gasteizen.
