AEK aitzindaria da barnetegiak antolatzen, eta 20 urtetik gorako esperientziak argi erakusten du jarduera honek euskalduntze prozesua nabarmen azkartzen duela. Urte hauetan guztietan makina bat pertsonak hartu du parte ikastaroetan, eta horrela euskara modu oso naturalean praktikatzeko aukera izan du. Duda barik, ikastaro mota hauek dira urte sasoi honetan euskara ikasteko aukerarik onena, arin eta ondo ikasten baita hauetan parte hartuz gero. Bertan, ikasleak 24 orduz euskal giroan murgilduta egoteko aukera dauka, bai klasean bai klasetik kanpo ere. Hala, barnetegian denetariko gauzak egiteko astia dago: klaseak hartzeko, noski, baina baita txangoak egiteko, lagun berriak ezagutzeko, kultur ekintzak antolatzeko, euskara praktikatu eta zuzentzeko...azken batean, egun osoan euskaraz bizitzeko. Horretarako AEK-k bere esperientzia jartzen du; 23 urteko eskarmentuaz baliatuta, irakasleen prestutasunaz gain, hizkuntzen irakaskuntzan lortutako metodorik eragingarrienak jartzen ditu, euskara ikasteko prozesua ahalik eta azkarren eta modurik atseginenean egin dadin.

Barnetegiak Euskal Herrian zehar antolatzen ditugu: Bizkaian, Gipuzkoan, Nafarroan, Nafarroa-Beherean eta Zuberoan. Herriak aukeratzerakoan kontuan izaten ditugun irizpideak honako hauek dira: lehenengo eta behin, eta izan ere berau da irizpiderik garrantzitsuena, euskaldun kopuru altua izan dezala (%75 baino gehiago) eta bigarrenik herriko jendearen artean barnetegikoekin ekintzak antolatzeko gogoa egotea. Argi dago askoz errazagoa dela jendea herrian integratzea bertakoak laguntzeko prest badaude. Eta izan ere, urte hauetan zehar herrietako jendearengandik jasotako laguntzaz oso pozik gaude. Jendea prest egoten da afariak antolatzeko, barnetegiko ikasleei hitzaldiak emateko, mendi-irteerak prestatzeko... beraien parte hartzeagatik ez balitz, barnetegiek ez lukete izango daukaten arrakasta, eta ikasketa-prozesuari dagokionez, ez lukete emango ematen dituzten emaitza onak.

Eskaintza uztailetik iraileko lehenengo hamabostaldira arte dago irekita eta ikasleek hamabost egun edo hiru asteko egonaldiak egin ditzakete Hego Euskal Herrian (Foru, Ondarru, Aduna, Aia, Amezketa, Lizartza, Oiartzun, Zaldibia, Zerain eta Arantzan). Datak honako hauek dira: uztailean 1etik 14ra, 15etik 28ra edo 1etik 21era. Abuztuan 5etik 18ra, 19tik irailaren 1era edo 5etik 25era. Irailean 2tik 15era. Urepelen hamabi egunekoak izaten dira egonaldiak; uztailaren 1etik 12ra, 15etik 26ra, 29tik abuztuaren 9ra edo abuztuaren 12tik 23ra. Azkenik, Ligin 6 eguneko egonaldia dago prestatuta, abuztuaren 5etik 10era. Azken honetan antolatzen den ikastaroa zuberera ikastaroa da. Bukatzeko, Hegoaldeari dagokionez, 3.urratsetik aurrerako ikasleekin antolatzen dira ikastaroak eta Ipar Euskal Herrian, ordea, lehenengo urratsetik aurrera antolatzen dira.

Barnetegiak urraska antolatzen ditugu, normalean bakoitzera talde bi bidaltzen dira eta ahalik eta urrats antzekoenak izatea ere kontuan izaten dugu. Uste dugu, beti ere talde bien arteko komunikazioa errazago sortu eta garatuko dela baldin eta aparteko desberdintasunik ez badago. Eguneroko klase orduak jaso ondoren, goizez lau eta bazkalostean beste bi, arratsaldeko zazpietan tailerrak antolatzen dira. Hauek ikastaro hasieran erabakitzen dira; norbaitek dantza egiten badaki hori prestatzen da, edo txalaparta jotzen edo larruzko pultserak egiten...Tailerretan, gauza berriak ikasteaz gain, jendea egun osoko zereginetatik erlaxatzen da eta beraien arteko harremanak ere sendotzen dira.

Urte batzuetatik hona hainbat berrikuntza bizi izan ditugu barnetegietan. Bertatik igarotako ikasleen balorazio onek bide berriak bilatu eta gauzatzera animatu gaituzte. Bilaketa horren emaitza zuzenak dira guraso-barnetegiak, barnetegi ibiltaria, mendebaldeko euskara eta zuberera ikastaroa. Lehenengoak guraso eta seme-alaben arteko komunikazioa euskararantz bideratzea du helburu, haien artean euskaraz aritzeko ohitura sendotzea, alegia. Gurasoak eta seme-alabak barnetegi berean egoten dira, eta gurasoek eskolan beraien euskara hobetzen duten bitartean, seme-alabak, horretarako prestatutako begirale-hezitzaile talde batek zainduko ditu. Beraz, umeek sekulako oporraldia igarotzen dute eta gurasoek beraien euskara maila hobetzen dute. Klaseak goizez jasotzen dituzte gurasoek (5 orduz) eta ordu horietatik kanpo, guraso eta seme-alabek elkarrekin hainbat ekintza prestatu eta burutzen dituzte. Barnetegi hauek uztail eta abuztuko lehenengo hamabostaldian eskaintzen ditugu. Ikastaro mota hau urtetik urtera ikaragarri igotzen doa, eta gu geu ere, esperientziak irakasten digun heinean, barnetegi mota honek dituen berezitasunak zeintzuk diren eta sor daitezkeen erronka berrien aurrean zer egin behar dugun ikasten goaz; beti ere eskaintza hobetzeko asmoz, ezin baitugu ahaztu ume horiek hamabost egun egiten dituztela etxetik kanpo; eta helduentzat ahalik eta erosotasun gehienak lortu nahi izaten baditugu, zer esan umeentzat!

Aurten, eta urtero balorazio onenak jaso dituzten egoitza eta herriak zirela kontuan izanda, Foru, Oiartzun eta Zerain aukeratu ditugu guraso-barnetegiak antolatzeko.

Barnetegi-ibiltaria da eskaintza berritu hauen artean gazteena. Hamar bat egunez euskara praktikatzeaz gain, Euskal Herria bizikletaz zeharkatzeko aukera ematen die ikasleei. Mintza praktika egiten den bitartean, Euskal Herriko lekurik ederrenak ezagutzeko aukera eskaintzen du. Aurten, besteak beste, Zeberio, Otxandio, Armentia, Aoiz, Itsasu, Ainhoa, Altsasu, Zegama eta Zumaian zehar ibiliko dira abuztuaren 1etik 11ra. Bizikletaz herriz herri ibilita, lekuan lekuko hiztunen laguntzaz, zenbait euskalki eta ohitura ezagutzeko aukera galanta da hau. Ikasleek euskaraz komunikatzeko gutxieneko gaitasuna izan behar dute (5.urratsetik aurrera) eta bizikletaz ibiltzen ohituta egotea ere beharrezkoa da. Dena dela, ibilaldiaren erritmoa oso lasaia izaten da, eta geldialdi asko egiten dira.

Bukatzeko, mendebaldeko euskara eta zuberera ikastaroak dira azken urteotan ere aurrera atera ditugun eskaintzak. Lehenengoari dagokionez, euskalduntze prozesua amaitu dutenentzako ikastaroa da. Helburu nagusiak, besteak beste, hobeto berba egitea, inguruko euskalkiak ulertzea eta ahozko eta idatzizko kodeak bereiztea dira. Aurten uztaileko bigarren hamabostaldian izango da, 15etik 28ra hain zuzen ere. Zuberera ikastaroari dagokionez, euskalki hau ezagutzeko parada izateaz gain, herrialde horretako errealitatean murgiltzeko aukera paregabea ere bada. Klase-orduez gain, bertako ohiturak eta bizibideak ere bertatik bertara ezagutu eta bizi ahal ditu ikasleak. Ikastaro hau abuztuaren 5etik 10era burutuko da Ligin.

Orain arte aipatutako guztia da, ikastaro trinkoekin batera, AEK-k udari begira plazaratzen duen eskaintza. Aurten ere, urtero legez, uda honetan barnetegietan parte hartu nahi duten ikasleen egonaldia ahalik eta aberasgarrien eta erosoena izateko ahaleginak egingo ditugu.