1914. urteko ekainaren 30an Xabier Peña Albizu jaio zen

Iturria: Lur Hiztegi Entziklopedikoa

	Xabier Peña Albizu.

Gipuzkoar irakasle eta idazlea (Tolosa, 1914 - Tolosa, 1980). Iruñean egin zituen maisu ikasketak eta Lovainan (Belgika) soziologiakoak. Euskal Herrira itzulirik, Bilbon ibili zen irakasle. El Día, Euzkadi, Karmel eta Izaskun agerkarietan eman zituen argitara lan aipagarraienak. Obra nagusiak: Ene potxolo (komedia), Euskal Irakasbide laburra (1958), euskara ikasteko metodoa; Abere alaiak (1969), haurrentzako ipuinak. Mendizalea zen, eta urrutiko mendietara ibilaldiak egiten zituen, Xebe anaiarekin batera. 1975ean, Kilimanjaro mendira egindako bidaia bat zela eta, Afrika-Sorkaldean ibillaldi bat izeneko liburua argitaratu zuen. Euskaltzain urgazlea izan zen.

Bingen Amezaga Aresti 1901 urteko uztailaren 1an jaio zen Algortan

Iturria: Harluxet hiztegi entziklopedikoa

Bingen Amezaga Aresti.

Euskal idazle eta itzultzaile bizkaitarra (Algorta, 1901 - Caracas, 1969). Caracas eta Montevideoko Unibertsitateetan zuzenbide-irakaslea izan zen. Euskal adizkarietan ipuin, narrazio eta saiakerak argitaratu zituen eta itzulpengintzan nabarmendu zen: Wilde-ren Reading Baitegiko leloa; Shakespeare-ren Hamlet eta Danemark’eko Erregegaya; Goethe-ren Lur-Miña; Plinioren Plini gaztearen idazkiak; Eskiloren Prometeu burdinetan; Zizeronen Adiskidetasuna; Deskartesen Metodoaren diskurtsoa eta Juan Ramón Jiménez-en Platero ta biok (1952-1968) itzuli ditu. Euzko Jaurlaritzako Hezkuntzako ministro izan zen (1936). Gerra Zibilaren garaian Frantzia, Ingalaterra, Argentina eta Caracasera erbesteratu zen. Euskaltzain urgazlea da.

Juan Garbizu Salaberria idazlea, Zubigar, 1893ko uztailak 5 jaio zen

Iturria: Lur Hiztegi Entziklopedikoa

	Juan Garbizu Salaberria.

(“Zubigar”). Gipuzkoar idazlea eta itzultzailea (Lezo, 1894 - Lezo, 1930). Zeruko Argia, Euskal Esnalea, Argia, Arantzazu eta Argentinako La Baskonia agerkarietan eman zituen argitara lan aipagarrienak. Obra nagusiak: Ostegun Deuna (1924) olerkia, Euskera arrobitzat (1924) olerkia, Cervantesen Kixote (IX. kapituluaren itzulpena, 1928), La señora Cornelia Cervantesen liburuaren itzulpena (1928), Txori ausarditsuak (1929) ipuina, eta Aizkorri eta itsasoa (1929) bakarrizketa. Buenos Airesko Euskaltzaleak elkarteko lehen idazkaria izan zen. Errenteriara lanera zihoala tren batek harrapatu eta hil zuen. Daniel eta Tomasen anaia zen.