Testuak, diskurtsoak eta generoak
Euskal testuen azterketa korrontea

Egileak: Itziar Plazaola eta Maria Pilar Alonso Foucarde (Editoreak
Argitaletxea: Erein
Orrialde kopurua: 251
ISBN: 978-84-9746-375-1

Ezaugarriak: Argitalpen honek, bere barneko arkitekturan aldatuz joan den arren, hartzaile nagusi bat izan du hasiera-hasieratik: guztiz gizatiarra den jarduera horretan, hizketan, eta orobat hizketak sortzen dituen testuetan, interesatuak dauden ikerlari berriak, beren espezialitatea gorabehera. Helburua ere oso argi egon da beti: oroz gain helburu didaktikoa da. Irakurle berriei lan-ildo berri bat ezagutarazi nahi zaie, gizakiok elkarrekin komunikatzeko dugun modu guztiz berezi hori, testu-ekoizpenen analisi enpirikotik abiatuta ulertzeko eta eredu teorikoen bitartez azaltzeko ahaleginean hogei urtetik gora daramatzana; hain modu berezia da, non gizakitzat ondoena definitzen gaituena baita.

Lan-ildo honetaz hitz egitea Genevako Psikologiako eta Heziketako Zientzietako Fakultateko Hizkuntzen Didaktikako saila aipatzea da, eta, horrez gainera, baita munduko beste lekuetako beste zenbait lantalde ere, Euskal Herrikoak barne, zeinek humanizazioaren prozesuari buruzko oinarri epistemologikoak partekatzen baitituzte, ildo hau "elkarreragile sozio-diskurtsibo" gisa definitzen dutenak.

Oraingo honetan, lan kolektibo honen argitaratzaileen asmoa, gaur egun Euskal Herrian ikuspegi honetatik euskal testuari eta haren didaktikari buruz egiten ari diren ikerketa-lanen panorama aurkeztea da, eta era berean, hainbat ikerlarik nola edo hala partekatzen dituzten eta beren ugaritasunean bateratzen dituzten oinarriak eta eredu teorikoak nahi dira eguneratu.

Itziar Plazaola. Genevako Psikologiako eta Heziketako Zientzietako Fakultateko "Chargée de cours" da, eta orobat aritu da irakasle-lanetan Aostako eta Arrasateko Unibertsitateetan. Bigarren hizkuntzen didaktikako irakaslea da, eta testuen analisia landu du, euskaraz eta frantsesez. Bere ikerketa-ildoetan, pertsona helduentzako hizkuntz irakaskuntza eta irakasleen lanaren analisia daude, irakasleen prestakuntzaren azterketaz gainera.

Maria Pilar Alonso. Genevako Psikologiako eta Heziketako Zientzietako Fakultateko LAF (Langage-Action-Formation) taldeko "Membre associé" da, eta talde horrekin elkarlanean, euskal testuen analisitik abiatuz, ikerketa-lan propio bat egiten du, zeina konplexutasunaren eta fraktalen ereduak testuaren antolamenduaren eta barne arkitekturaren modelizazioaren analisiari aplikatzean oinarritzen baita.

Ondorengo hauen lankidetzarekin: Marian Bilbatua, Ines Garcia, Itziar Idiazabal, Luis M. Larringan, Roberto Mielgo, Matilde Sainz, Begoña Ocio eta Jean Paul Bronckart-en parte-hartzearekin.

Amerikako hizkuntza aniztasuna
La diversidad lingüística en América

Egileak: Belen Uranga, Andoni Barreña, Itziar Idiazabal, Estibaliz Amorrortu, Ane Ortega eta Estibaliz Izagirre
Argitaletxea: Erein
Orrialde kopurua: 216
ISBN: 978-84-9746-410-9

Ezaugarriak: UNESCO Etxeko Amarauna taldeak egindako lan honetan, Amerikako hizkuntza-aniztasuna ezagutzeko oinarrizko informazioa ematen da, Mexikotik hasita Hego Konoraino. Liburu honekin, hiru helburu bete nahi ditu Amaraunak: Amerika kultura- eta hizkuntza aniztasunean zein aberatsa den erakustea, hizkuntza eta kultura amerikar asko desagertzeko arriskuan daudela jakinaraztea eta, azkenik, jendeari munduko hizkuntza-ondarea gordetzearen garrantziaz kontzientzia harrarazi eta horretan sentsibilizatzea. Amerika da mundu osoan aniztasun handiena duen kontinenteetako bat, eta, proiektu honekin, batetik, aniztasun horren berri eman nahi zaio gizarteari eta horretan sentsibilizatu eta, bestetik, ohartarazi nahi dugu aniztasun hori errespetatzea bidezko garapena bermatzeko bide bakarra dela. Gainera, balioetan eta elkarren arteko errespetuan oinarritutako hezkuntza sendotu nahi da, giza eskubideen funtsezko oinarria izan dadin. Horren guztiaren helburua zera da: desagertzeko arriskuan dauden hizkuntzak eta kulturak berreskuratzeko eta biziberritzeko programak sustatzea eta babestea.

Euskal testuen azterketa eta euskararen irakaskuntza. Ikerketak eta gogoetak

Egileak: Itziar Idiazabal eta Ines Gartzia, ed. apail.
Argitaletxea: Eusko Ikaskuntza
Orrialde kopurua: 145
ISBN: 84-8419-011-0

Ezaugarriak: Euskararen irakaskuntzarako ekarri didaktikoa duten zazpi lan biltzen dira Ikastariaren 14. zenbaki honetan. Lehendabiziko artikuluan euskararen kalitateari buruzko gogoeta, eta euskararen erabileran gerta daitezkeen gauzatze ezberdinak objektibotasunez aztertzeko metodologia proposamena datorkigu Larringan eta Idiazabalen eskuetatik. Hurrengo lau lanetan Diaz de Gereñuk; Garro eta Idiazabalek; Garcia Azkoagak; eta Bilbao eta Ociok ahozko eta idatzizko testuera jakin batzuen azterketa eta zenbait ondorio didaktiko aurkezten dituzte. Ondoren, Ocio eta bere kolaboratzaileen hizkuntzaren ikaskuntza-irakaskuntzari buruzko gogoeta interesgarri bat dator. Bukatzeko, irakaste-ikaste esperientzia batean oinarrituta, euskara ikasteak sortutako bizipen eta gogoetara hurbiltzen gaitu Ugartetxeak.

Hizkuntza politika aurrera begira
Hizkuntza Politikarako Sailburuordetzaren 2005-2009 egitasmoa

Egileak: Hainbat
Argitaletxea: Eusko Jaurlaritza
Orrialde kopurua: 70 euskaraz / 74 gaztelaniaz
ISBN: 84-457-2407-X

Ezaugarriak: Dokumentu honetan aurkezten dizkiguten lan-ildoek datozen urteotan hizkuntza politikan jarraitu nahi den norabide nagusia erakutsi nahi dute. Bertan esaten den bezala, erabileraren aldeko dema honetan gizarte osoaren inplikazioa beharko dugu. Horregatik, hizkuntza normalkuntzaren inguruan elkarrizketa sozial eta politiko etengabea bultzatzea proposatzen da. Elkarrizketa lasaia, irekia, kritikoa, aurreiritzirik gabea, gardena, zintzoa. Euskarak ahalik eta adostasun sozialik zabalena behar eta merezi duelako. Ondoren aurkezten diguten gogoeta hauek, beraz, elkarrizketa hori bultzatzeko abiapuntu egokia izatea nahi da.