IGOR OBESO AGUIRRE
Beira
2002 / 02 / 08-15
Egilea: Antxon Aguirre Sorondo

ARTISAUA

Gaur aurkezten dizuegun artisauak, gaztea den arren, oso teknika eta ikuspegi helduak ditu bere lanbideari buruz.

Igor Obeso Aguirre 1974an jaio zen, Donostian. Ikasketak egin ostean, oso gaztea izanik, eta modu autodidakta batean, beira lantzeari ekin zion: hondakinetako beira eta leiho moduko planoak erabiliz, moztuz, itsatsiz eta hainbat metalez baliatuz, lanparak egiten zituen. Elementu eta diseinuekin jolasten, objektu artistikoak sortzen zituen. Horrelakoak izan ziren beirarekin izan zituen lehenengo kontaktuak.

Esperimentatzen jarraitzeko grinak bultzatuta, beirateen munduan sartu zen. Kobrezko zinten teknika erabiltzen zuen. Gogoan izan behar da Irunen oso beiragile onak daudela, José Luis Alonso adibidez.

Hurrengo pausoa, beiraren kolorea, bolumena eta egitura aldatzea izan zen. Horretarako, puzte teknikak erabiltzen zituen, modu horretan "nik nahi bezalako beirak sortzeko". Izan ere, bere gustuko egitura, kolore eta itxurako beirak lortzen zituen horrela. Gainera, puzte lanak egiterakoan pieza "airean" egoten denez, inon apoiatu gabe, beiran ez da inolako markarik gelditzen, eta oso pieza garbiak lortzen dira.

Are gehiago hobetzeko, Pere Ignasi artisauaren tailerrera joaten da, Palma de Mallorcara. Igorren iritzian, Espainiako beira-putzegilerik onena da, eta Europako onenetakoa.

Era berean, fusio eta termofusioko teknikak ikasten ari da, gure artean oraindik oso gutxi erabiltzen diren teknikak biak ala biak.

Gaur egun, enkarguz egiten du ia lan guztia. Noizean behin artisautza azoketara joaten da.

Remigio Mendiburu eskultore ezaguna zenaren tailerrak zeuden lekuan dauka bere lantokia, Hondarribian. Hantxe dauzka bere labeak eta baita bere produktuen erakusketatxo bat ere.

Labeak gasezkoak dira, pirometroa daukate, eta 1.200 eta 1.400ºC arteko tenperaturan egoten dira.

Normalean erosi egiten du lehengaia, baina batzuetan berak egiten du, ibaietako harri silizeoekin edo hare silizio industrialekin. Kontuan izan behar da kalitatezko beira sortzeko, batzuetan 10 osagai desberdin nahastu behar izaten direla (silizeak, fundenteak, koloranteak, etab.). Beraz, oso produktu desberdin ugari lor daitezke konbinazio posible guztien artean. Horregatik dio Igorrek: "pieza bakoitza bakarra da" .

Gaur egun Igor da Euskal Herrian beira airean puzten duen bakarra. Estatu mailan, berriz, ez dira dozena erdi baino gehiago horrela aritzen diren artisauak. Besterik da moldeko puzketa, Mallorcako artisau gehienek egiten dutena.