LANDER URKIA
Zurezko Tailak
2003 / 07 / 04-11
Egilea: Antxon Aguirre Sorondo

BITARTEKOAK

Bai berak eta bai bere ikasleek, haritzaren zura lantzen dute gehienbat. Oso zur gogorra da, eta beraz dezente landu behar izaten da. Zainak oso ondo ikusten zaizkio, eta horrek garrantzi handia du zizelkatzeko orduan. Gero ikasleei zur bigunagoak emanez gero, gaztainondoarena edo pagoarena adibidez, ez dute arazorik izaten, baina zur bigunak zizelkatzen ikasten badute, eta gero gogorrago bat ematen baldin bazaie, gaizki moldatzen dira. Azkenerako, zur mota guztiak lantzen ikasten dute: pagoa, gereziondoa, lizarra, etab.

Landerrek zur mota ugari erabiltzen ditu, eta egin nahi duenaren arabera aukeratzen du bat edo beste.

Zura biltegizain bati erosten diote, lehorra. Pieza handi bat egin behar denean, pieza batzuk elkarri itsasten dizkiote. Eskolan teknika hau ere irakasten dute.

Tresnei dagokienez, ikasleek hasieran hiru gubia eta mailua erosi behar izaten dituzte, eta pixkanaka tresneria guztia osatzen joaten dira.

Laneko tresnak Landerrek berak zorrozten dizkie, baina batzuei nola egin ere irakasten diete, lehendabizi elektro-esmerilagailuan, eta bukatzeko olioztaturiko harrian.

Landerrek tresnen oso bilduma ederra du bere lanak egiteko.

Lehen Mifer markako gubia eta trintxak erabiltzen zituen, baina orain Henri Taylor etxe ingelesekoak erabiltzen dituzte. Peogeot-ekoak ere oso onak omen ziren.

Tailerrean, tresna bakoitzaren irudia txukun-txukun marraztuta duela, honakoak biltzen dituen panel bat ikus dezakegu: limak, arraspak, zerroteak, arku zerra, kurrikak, bihurkinak, gubiak, trintxak, guraizeak, giltza ingelesak, arotzen mailuak, nylonekoak, burubiribilak, hortzdunak, erregelak, eskuairak, nibelak, kalibreak, marrazak, bastrenak, grapagailuak, kurben txantiloiak, igorkiak, garlopak, garlopinak, mailuak, etab.

Landerrek ikasleek inolaz ere erabili ezin dituzten hainbat makina dauzka: trontza zerra, arrabotatzeko makina, fresatzeko makina, zutabedun zulatzeko makina, zinta zerra, atzera-aurrerako zerra, elektro-esmerilagailua, tornua, xurgagailua, eta eskuz erabiltzeko beste hainbat tresna txiki: zulatzeko makina, igorkia, etab.

Tornuan ibiltzen ere erakusten zaie zertxobait.