PROZESUA

	Pilota egiten.

Oro har esanda, pauso hauek eman behar dira pilotak egiteko:

• Normalean Brasildik ekartzen den latexezko materiala prestatu.
• Ezpelaren zurezko edo plastikozko bolaren gainean latexezko geruzak jarri.
• Bere gainean, eta diametroa osatu arte, artile birjina jartzen da. Lan hau erraztearren, artilea hezetu egiten da.
• Pilotaren forma daukan molde batean gainean mailuarekin kolpatuz, behar adina aldiz estutu.
• Bere gainean, kotoizko hariz egindako geruza bat ipini.
• Txantiloi batekin, ahuntzaren larruan bi pieza moztu. Kanpoaldeak (abereak ilea zeukan aldea) barrura begira gelditu behar du. Horrela egiten da pilotaren kanpoaldea.
• Larrua josi, pilota osatzeko.
• Josturak leuntzeko, gainazal gogor baten gainean birak emanarazi.
• PUNPA etxearen zigilua jarri.

Eskupilotan ibiltzeko pilotei gantza ematen zaie gainetik, partiduari hasiera eman baino apur bat lehenago. Materiala aukeratu baino egun bat edo bi lehenago, berriz, pilotak garbigailuen danbor moduko biltegi batean jasotzen dira, elkarri joz tenperatura egokia lor dezaten. Anderren esanetan, berak egiten dituen pilotek ez dute tratamendu horren beharrik.

Zenbaitetan, eta neguan batez ere, partiduei hasiera eman baino lehen, barnean burko elektrikoa daukaten zumezko sakitxoetan gordetzen dira pilotak, epel mantentzeko.

Ikus dezagun zein pauso eman behar diren larruzko eskularru bat egiteko.

Punpako langilea.

• Larrua garbitu: zekorraren larrua, garbitzeko, ur eta karearen arteko nahasketa batean sartu, eta hiru egunez bertan uzten da. Ondoren, atera eta urez ondo garbitu behar dira.
• Txantiloiez baliatuz, larrua moztu.
• Larrua oraindik bustita dagoela, moldearen gainean jarri. Han lehortu egingo da, eta behin betiko forma hartuko du.
• Bigarren geruza ezarri. Lehendabizikoa lehortu denean (hiruzpalau egunetan), beste geruza bat jartzen zaio gainean, eta hau ere lehortzen uzten da.
• Gauza bera, hirugarren geruzarekin.
• Kirolariaren eskua babestuko duen eskuzorroa prestatu.
• Hiru geruzak eta eskuzorroa josi.
• Kolorea eman.