ARTISAUA

1934ko otsailaren 23an jaio zen, Almerían. Lehen mailako ikasketak egin ostean, bere aitak –ogibidez ebanista- tailer batean sartu zuen, zizelkatzen ikas zezan. Bien bitartean, Almeríako Arte eta Lanbideen Eskolara ere joaten zen, marrazketa eskolak jasotzera.

Bere anaiak Donostian egin zuen soldadutza, eta bertara joateko esan zion. Hamazazpi urterekin, beraz, gure artisaua Errenteriako Ondartxo auzoan kokaturiko Fermín Lesacaren tailerrean hasi zen ikastun gisa lanean.

Soldadutza egin ondoren, aipaturiko tailerrera itzuli zen, baina haientzat ez ezik, beste batzuentzat ere aritzen zen lanean, autonomo gisa afiliatuta egon baita beti. Horrela, Donostiako Euskal Herria kalean ebanisteria eta tapizgintzako tailerra zeukaten Iparraguirre anaientzat ere ibili zen altzariak zizelkatzen, eta baita hiri bereko Urbieta kalean, Arte Ederren eraikinaren aurrean zegoen beste ebanisteria batentzat ere. Irungo Consuelo Fernándezen tailerrerako ere bai.

Gerora, Behobiako Ceberio tailerrean hasi zen lanean, eta 13 urte eman zituen bertan. Irunen bizi zenez, egunero ibiltzen zen Behobiara joan-etorrian.

1972az geroztik ia gaur arte, Nestor Basterretxea artistarentzat aritu da lanean.

1980an, gaur egun aritzen den tailerra zabaldu zuen.

Hainbat urtez, zizelkatzen ikasteko klaseak eman zituen Debako Artisautza Eskolan eta Irungo Lanbide Heziketarako Bidasoa Institutuan.

Artisautza azoka bakar batera joan da: 2005eko abenduan Irungo FICOBAn antolatu zenera.

1973an Maite Urrestirekin ezkondu zen, eta 3 seme-alaba dauzkate: Mikel (1975ean jaioa), Jon (1977an) eta Maitane (1983an).

LUIS SALMERÓN NIETO Zapatainzabala kalea 11 20303 IRUN Tef.: 943 62 92 42

Zure iritzia / Su opinión
euskonews@euskonews.com