ARTISAUA

Ramón García Errenterian jaio zen, 1957ko abuztuaren 4an. Hiru anai-arreba dira, bera gazteena. Aita Errenteriako enpresa bateko administraria zen ogibidez, baina Ramonek 4 hilabete baino ez zituela hil zen. Argazkizale amorratua zen, eta aisialdian argazki-erreportajeak egiten zituen. Marrazkia eta pintura ere oso gogoko zituen. Amak, aldiz, zaletasun handia zuen jostungintzarako. Bistakoa da horrek guztiak eragina izan zuela Ramón txikiaren etorkizunean.

Lehen ikasketak eta batxilergoa bukatutakoan, “Artea eta Dekorazioa” ikasi zuen Donostian. Gero dekoratzaile-lanetan jardun zuen, eta urtebetez bere espezialitateko maisua izan zen EAD akademian (orain desagertuta), Donostian. Ondoren soldadutzara joan zen, eta itzulitakoan beste 5 urte egin zituen EADen eskolak ematen. Lan horretan ziharduela, “Diseinua eta Moda” ikasi zuen, azterketak Zaragozan eginez. Ikasketa horiek bukatu zituenean, 27 urterekin, “Dekorazio eta moda-diseinuko” enpresa ireki zuen Donostian, beste bazkide batekin. Barrualdeak ez ezik, arropak ere diseinatzen zituzten, eta bezeroetako bat ETB edo Euskal Telebista zen.

Gipuzkoa eta Bizkaiko nekazarien janzkiak. XX. mendea. Arramendi baserria.

Bestalde, 14 urterekin Errenteriako Iraultza-taldean hasi zen dantzatzen. Garai hartan, Errenteriako Kaputxinoek utzitako etxabeetan egiten zituzten entseiuak.

Modaren munduan zebilenez, dantza-taldean sartu eta denbora gutxira bere gain hartu zuen jantzien ardura. Gaia ikertzen eta aztertzen hasi zen, eta dantzarien jantziak egiten ere bai.

39 urte zituela, enpresa bertan behera utzi eta dantza-taldeentzako arropak egiteari ekin zion. Horixe da gaur egun ere bere lanbidea.

XVIII. mendeko janzkiak. Zubiaurre jauregia.

Ramónen antzinako jantzien bilduma oso handia da, eta arropa batzuk zaharrak benetan: 1850ekoak. Errenteriako Udalak euskal jantzi tradizionalei buruzko Museo/Erakustokia irekiko du laster Ramónen bildumarekin. Arropak Morrontzo dorretxean egongo dira ikusgai, udalbatzak duela gutxi erosi baitu eraikina.

CURRICULUM VITAEAREN LABURPENA

1980 – 1989- Koloreztatze eta marrazki artistikoko maisua EADen, Donostiako arte- eta dekorazio-eskolan.

1987 – 1990- Hainbat arropa-bilduma diseinatu eta egin zituen Euskal Modaren Asteko diseinatzaile berrien atalerako.

1989 – 1996- Muxkoko S.L. enpresaren bazkide fundatzailea. Moda-diseinua, estilismoa, dekorazioa eta jantzigintza dira enpresaren jarduerak.

1991 – 1993- Muxkoko S.L. enpresako estilista EITBko “Hondartzara” saioetarako eta “Juntos y revueltos” telesailerako.

1995- Muxkoko S.L. enpresako estilista HABEk grabatutako bideo didaktikoetarako.

1997 – 2002- “Aukeran” dantza-konpainiaren jantziak egin eta estilismoaren eta diseinuaren ardura.

1999- “Agota” pastoraleko jantziak egin eta estilismoaren eta diseinuaren ardura.

2000- “Madalena Jauregiberrykoa” pastoraleko jantziak egin eta estilismoaren eta diseinuaren ardura.

2000- “Gus eta Gas” antzerki-laneko jantziak diseinatu eta egin.

2001- “Makiak” pastoraleko jantziak egin eta estilismoaren eta diseinuaren ardura.

2002- “El amigo de Jon Wayne” antzerki-laneko jantzi batzuk diseinatu eta egin.

2002- Aurre-proeiektuetako irakaslea Donostiako EAD arte- eta dekorazio-eskolan.

2002- “Peirot Urruti” pastoraleko jantziak diseinatu eta egin.

2003- “Ramuntxo” pastoraleko jantziak diseinatu eta egin.

2003- “Aukeran” dantza-konpainiaren “izena duen guztia omen da” ikuskizuneko jantziak egin eta estilismoaren eta diseinuaren ardura.

2004- “Antso Handia” pastoraleko jantziak diseinatu eta egin.

2005- “Bereterretx” pastoraleko jantziak diseinatu eta egin.

2006- “Aukeran” dantza-taldearen “bideak” ikuskizuneko jantziak egin eta estilismoaren eta diseinuaren ardura.

2006- “Sta.Engrazi” pastoraleko jantziak diseinatu eta egin.

BESTE JARDUERA BATZUK

Euskal jantzi tradizionalei buruzko ikerketak.

Euskal jantzi tradizionalei buruzko erakusketak eta hitzaldiak Euskal Herri osoan.

Errenteriako Iraultza dantza-taldearen sortzailea eta egungo zuzendaria.

Errenteriako Iraultza dantza-taldeko jantzi-zuzendaria.

Euskal Dantzarien Biltzarreko jantzi-aholkularia

Ramón García
IRAULTZA dantza-taldea
Jesus Guridi kalea, 9. zk.
Beraun auzoa
ERRENTERIA
Tel.: 943 51 21 03

Zure iritzia / Su opinión
euskonews@euskonews.com