SARRERA

Euskal jantzien gaia jorratu dugu lehenago ere. Horrela, Zornotzako “Jaialdi” artisau-etxeaz mintzatu ginen: euskal jantziak egiten dituzte, bereziki “kaikuak”. Beste ale batean, Gloria Sukia debarraren lanak eman genituen ezagutzera.

Lekeitio eta Donostiako janzkiak. XVI. mendea. Morrontxo dorretxea.

Gure gaurko artisaua aurkezterakoan arazoa sortu zait, “jostuna” dela esatea, besterik gabe, ez baita zehatza. Ramón García jostuna da, bai, arropak egiten dituelako. Baina urte asko daramatza euskal jantzien nondik norakoak aztertzen, Euskal Herria txokoz txoko zeharkatzen, argazkiak ateratzen, antzinako argazki eta grabatuak bilatzen, eta lehengo arropen bilduma osatzen. Hori guztia kontuan hartuta, argi dago etnografoa, folklorezalea eta ikertzailea ere badela gure gizona. Dantza-taldeetako arduradunek berarengana jotzen dute maiz, ez bakarrik jantziak egitera, baita argibideak eta aholkularitza eskatzera ere, gaiari buruzko hitzaldiak eman ditu eta.

Urdiaingo janzkiak (Nafarroa). XX. mendea. Gaztaño auzoa.

Ramón García ez dago ados “euskal jantzi tradizionala” terminoarekin. Gure arbasoek era askotako jantziak erabiltzen zituztela dio, tokian tokikoak eta garaian garaikoak. Erronkariko eta Bermeoko jantziak ez dira berdinak, ez eta, adibidez, toki horietan XIX. mendean erabiltzen zituztenak eta gaur egungoak ere.

Zure iritzia / Su opinión
euskonews@euskonews.com